الاثنين، 12 مارس، 2007

شغل جديد

جالي عرض شغل هايل جدا مبارح والحمدلله
واللي مش عارف الحكاية ممكن يعرفها من بوستات قديمة
زي ده
او ده




عارفين بأى لما الواحد يحس ان الفرصة جاتلو ومش عايز يضيعها

وفي نفس الوقت قلقان جدا وخايف من المسؤولية الجديدة والوضع الجديد


ده انا حتى بفكر ما اقبلش العرض خالص

يا ريت تسعفوني بنصيحة

او بأي حاجة

اتكلمو

عبرو كل واحد عن رأيو

مش عايزة احس اني بفكر لوحدي

عشان طلبوني ابدأ معاهم من اول ابريل

قلقانة اوي وخايفة

يا رب دلني عالطريق الصح

هناك 16 تعليقًا:

أحمد سلامة يقول...

روحي جربي
وماتضيعيش وقت
بس خلاص

Sampateek يقول...

الف مبروك ربنا يوفق
ثقي في قدراتك و ركزي و خليكي نشيطة و ايجابية و حتبقى ممتازة ان شاء الله

shady يقول...

أي عمل مهما كان بسيط له أهميته .. يعني كده كده دي مسؤولية ..

الخوف اللي انتي فيه لو خوف من التغيير أو انها حاجة جديدة دا طبيعي بس اللي .. مش طبيعي انك تستسلمي للخوف دا.. أكيد علي مدار حياتك (الطويلة ان شاء الله ) هاتختبري حاجات جديدة كل شوية .. الفكرة بس تحسبيها صح ..بالورقة والقلم والارتياح النفسي ان العمل دا لو استمريتي فيه فترة طويلة من ةحياتك مش هاييجي وقت وتحسي انك ماحققتيش ذاتك ..

فكري كويس .. أتمني اكون أفدتك .. وان شاء الله خير

Blank-Socrate يقول...

كل شغل مميزات و عيوب و لازم فى عيوب للشغل الجديد قارنيها بموضوعيه مع القديم مش بالعواطف

algafry يقول...

توكلي علي الله

أميرة البلطجية يقول...

صلى استخارة
وامشى فى الموضوع
حتندمي ع الحاجات اللي معملتهاش اكتر من ندمك على اللي عملتيه
انتي قدها وقدود

emos يقول...

بتفكرينى بنفسى يا فلة انا اول لما اتخرجت

emos يقول...

انت فكرتينى بنفسى اول مرة اشتغلت بعد لما اتخرجت على طول كنت فرحانة اوى و مش فى بالى بقى لا مسؤلية ولا خايفة ولا اى حاجة خالص و فوجئت بعد لما كتبت العقد ان الراجل صاحب الشغل راح مطلعلى ورقة فيها الشغل اللى انا هعملو و كان كاتبة فى 22 نقطة انا شفت الورقة جالى السكتة القلبية بس قلت انا هدبس نفسى و اللى يحصل يحصل و بعد كدة لقيت الموضوع بسيط و عبيط خالص و الشغل كان عبارة عن حاجتين او 3 حجات من اللى مكتوب فى الورقة بس هو خلاهم 22 يعشان يحسسنى ان الشغل مهم و كتيير و بس
ربنا يوفقك يا حببتى و لازم تعرفى ان همة اللى عايزينك مش انتى اللى عايزاهم

فلة يقول...

احمدسلامة
ميرسي لانك اختصرت كل اللي عايزاه يتقاللي


سمباتيك اللذوذة
شرفتيني يا عسولة
يشرفني ثقتك الغالية اوي على قلبي

فلة يقول...

شادي
على العكس تماما
العمل اللي معروض علي هو اللي حاساه ح يحققلي ذاتي فعلا ان شاء الله
بس مش عارفة ليه مترددة
اصل جالي عرض تاني بعد البوست ده بيومين
والدوام اقل بكتير
طبعا بحكم مانا متجوزة وعندي بيت
افضل العرض التاني اكتر بكتير
بس المرتب هو المشكلة
ربنا يصلح الحال ويدلني مش بقوللكم محتارة اوي

فلة يقول...

بلانك سوكراتيز
المقارنة دلوقتي مش بين الشغل اقديم والجديد
بل بين شغلين جداد معروضين علي
والاجمل من ده كلو
ان فيه عرض تالت استلمتو بس النهارده

يا حيرتي يا ناري

فلة يقول...

الجعفري
شكرا عالافادة


اميرة حبي انا
ميرسي عالثقة الغالية
وعلى انك فكرتيني بحكمة كنت ماشية عليها وانا صغيرة
على فكرة انا بصلي استخارة كل يوم
بس كل اما اصلي استخارة يجيني عرض جديد

فلة يقول...

emos
الشغل اللي انا فيه دلوقتي مصيبتو اني ما فاصلتهمش كويس في الاول
مش ه عيد التجربة تاني
انا ح طق منهم بجد

emos يقول...

يا بنتى عادى مش مهم الفصال لو مخدتيش منهم فلوس هاتخدى منهم خبرة اوعى شغل يقبلك و انتى تقولى لأ اقعدى فى على الاقل 6 شهوور عشان متبقيش طلعتى من المولد بلا حمص او اشتغلى فية لحد متلاقى غيرة

فلة يقول...

emos
اكيد مش ح قول لأ على حد قبلني
خاصة لوكان بمستوى الشركة اللي قبلتني دلوقتي
وللعلم انا مع الشركة اللي بشتغل معاها دلوقتي بمرتب هايف نسبة للشغل اللي بعملو
والشركة الجديدة مباشرة عطتني ضعف المرتب
مع ان معنديش خبرة في نفس المجال
انا بقصد تفاصليهم انتي ح تشتغلي ايه بالزبط عشان متبصيش تلاقي نفسك بتشتغلي كل حاجة زي ما حصل معايا
وبالنسبة لموضوع الست شهور انا بوافقك الرأي تماما
تحياتي

Abd El Rahman يقول...

مبروك.. بطلي قلق وركزي في اللي ناويه تعمليه وكله هيبق فل ان شاء الله