الجمعة، 13 يوليو، 2007

عيد ميلادي

مرحبا للكل
ميرسي للتعليقات واللي كتبولي في الشات بوكس
انا اليوم ببيت ناس قرايبي
صراحة بالصدفة دخلت النت وان شاء الله قريبا رح يصير عندي بالبيت كمبيوتر

بس حبيت اقول انو عيد ميلادي بعد يومين

تعالو باركولي هنا في البلوج

وبقول هاي كبيرة اوي لاميرة
واحشاني يا عسل

الأحد، 1 أبريل، 2007

غياب قد يطول

آمل الا يطول غيابي عن العالم الافتراضي

لكني منقطعة عن التدوين لفترة غير معروفة

وذلك بسبب عدم وجود كومبيوتر عندي في البيت

ولاني ح غير شغلي اليومين دول

ادعولي بالتوفيق انا جاني جواب التعيين النهاردة

عقبال عند العايزين

اشوفكم على خير ان شاء الله

متنسوش تدعولي

سلام

حبيبي

تناهى العشق فيكم واشتياقي

فعدني باللقاء أيا حبيبي

ببابك سيدي كان التلاقي

فهل لي عودة بين الغيوب

وهل لي زورة قبل المنايا

وهل لي دعوة هل من نصيب




صلى الله على محمد
صلى الله عليه وسلم
ربنا يوعدنا بزيارتو وشفاعتو
يارب

الاثنين، 26 مارس، 2007

نجحت.....والله العظيم نجحت

يووووووووووووووووووووووووبي





هيييييييييييييييييييييييييييييييييييييه
وييييييييييييييييييييييييييييييييييييي


نجحت اخيرا في امتحان السواقة

زغرطي يللي انتي مش ويانا


الحمدلله
الحمدلله
الحمدلله

الثلاثاء، 20 مارس، 2007

مرسيدس الجميلة

يمكن غالبية الناس تعتبر اللي انا فيه عبط
بس المدونة مقفولة تلات ايام حداد على


مرسيدس


القطة الصوغنونة الجميلة بتاعة اميرة البلطجية


الاثنين، 12 مارس، 2007

شغل جديد

جالي عرض شغل هايل جدا مبارح والحمدلله
واللي مش عارف الحكاية ممكن يعرفها من بوستات قديمة
زي ده
او ده




عارفين بأى لما الواحد يحس ان الفرصة جاتلو ومش عايز يضيعها

وفي نفس الوقت قلقان جدا وخايف من المسؤولية الجديدة والوضع الجديد


ده انا حتى بفكر ما اقبلش العرض خالص

يا ريت تسعفوني بنصيحة

او بأي حاجة

اتكلمو

عبرو كل واحد عن رأيو

مش عايزة احس اني بفكر لوحدي

عشان طلبوني ابدأ معاهم من اول ابريل

قلقانة اوي وخايفة

يا رب دلني عالطريق الصح

الأحد، 11 مارس، 2007

براءة الأطفال

بفكر

ليه مش بنحس ببهجة الحاجات الصغيرة اللي كانت بتفرحنا

ليه العيد بقى بيعدي علينا ولا منحس لو طعم

ليه ما بقتش عنينا بتلمع زي العيال الصغيرة لما نتابع افلام كرتون

ليه السهر بقى بيتعبنا بدل ما يكون اهم حاجة ممكن اننا نحارب مامتنا عشانها

ليه منخاف اوي من الموت

ليه نغلط ونخبي

ونضيع حاجات حلوة كتير

ونموت روحنا عشان الفلوس

وممكن ندوس على اقرب الناس

كل ده




بس عشان

فقدنا البراءة اللي كانت فينا لما كنا صغيرين

فقدنا العفوية اللي كنا بنتعامل بيها مع الدنيا

فقدنا شفافية قلبنا

وضي كان يلمع في عينينا لمجرد اننا نشوف بابا جاي وفي ايدو حاجة حلوة


يا ترى ح نقدر نحس الشعور الحلو ده تاني


والا خلاص؟؟؟؟





السبت، 3 مارس، 2007

برررررررررررررررد

دور برد مللي هو
كبس على نفسي من مبارح
اشوفكم على خير
باي باي بأى

الثلاثاء، 6 فبراير، 2007

عالم عيال عيال

الحكاية وما فيها اني ماكنتش عارفة ايه يعني العيال
لغاية ما جربت اني لحد دلوقتي ما عنديش
بحس اني مخنوقة طول النهار
عيال ايه يا شيخة تمتعي بحياتك.....قالتلي جارتنا اللي عندها خمسة بعيون العدو
لكن انا مابقيتش قادرة
حاسة ان البيت كبير علي انا وجوزي بس
وناس كتير اتجوزت بعدي وبقا عندهم اطفال
والشاطر فيهم بيقول
يللا مستنين ايه؟ شدو حيلكو وهاتولنا حتة عيل
هو بيتباع بالحتة في السوبرماركت واحنا مش عايزين نجيبو؟؟؟؟
حد يجاوبني يا ناس
لا و اهلو مش بيطيقو يقعدو معايا غير اما يسمعوني الموشح اياه
وارد واقولهم اصلو هو عايز كده (احنا اتفقنا نقول كده عشان ما يدايقونيش)
ماترديش على جوزك ...يا ستي ماردش عليه ازاي بس؟؟
وعلموبنات اختو الصغيرين يقعدو ويسمعوني النشيد الي حفظتهولهم التيتة المصونة
عايزين بيبي نلعب معاه
انتي مش عايزة تجيبيلنا بيبي زي ماما ليه يا طنط؟
بثي (يعني بصي) ماما فيه جوا بطنها بيبي وح تجيب لنا اخ نلعب معاه
ما تجيبي لنا انت كمان (الموضوع سهل اوي كده)
بقعد في الاوضة لوحدي وبعيط
مش عارفة اهدي نفسي ازاي
ولا عارفة اشيل الموضوع من بالي
ولا قادرة اصلا اشوف واحدة حامل في التلفزيون الا واعيط
واديني ابتديت اعيط دلوقتي اهوه
يااااه انا تعبت بجد
يا رب ارزقني بقى
ادعولي
تحديث
عيال...انا لقيت كليب حلو اوي
رفع روحي المعنوية جدا
شكرا ليكي يا انسانة

السبت، 20 يناير، 2007

سنة هجرية جديدة وسعيدة

كل عام والكل بخير
وتنعاد عليكم كل سنة وتكونو طيبين
يارب

الثلاثاء، 16 يناير، 2007

جامد أوي يا جوجل ....لا فعلا جامد أوي

الجوجل بيثبت من تاني انو احسن مترجم من العربي للانكليزي اون لاين
جرب تترجم كلمة يقدر من الانكليزي للعربي وشوف ح يحصل ابه
 

الأربعاء، 10 يناير، 2007

لحد هنا وبس

على رأي طاهر : هو كان استعباد؟
خلاص انا الجنونة طلعت في دماغي ومش قاعدالهم في المخروب ده يوم بعد كده
وقال ايه تنتن بيه عشان اتأخرت عشر دقايق الصبح يعمللي هليلة وسين وجيم وجيتي ايمتى ومن ايمتى بتتأخري كده ومن الكلام اللي يفقع المرارة ده كلو
يكونشي فاكرني اتأخرت عالليموزين الفاخرة اللي ببيعتهالي ننوس امو تاخدني ملبيت كل يوم الصبح
ده انا مش لاقية مواصلات
لا وهو اول ما اتفقنا عالشغل كان بيقوللي وح نجيب سيارة للشركة وح تاخدك وتجيبك
وكلام من بتاع الهجايص اللي بيقولهولي كل ما جت مناسبتو
ولا سيارة شركة ولا نيلة
انا لازلت من اكتر من سنة بجي لوحدي ومن غير حتى بدل مواصلات
وتقولو فلوس يقوللك دي شركة صغيرة واحنا لسه باديين يا شيخ روح اتنيل
بس بصراحة ما استحملتوش زي المرات اللي فاتت وانفجرت في وشو
انا حسيت انو انصدم وما كانش عارف يوقف سيل الكلام اللي كنت بقولو
الحاجة الوحيدة اللي فلح يقولهالي
طيب نتكلم بعدين وقفل السكة
وعنك ما اتكلمت
والله لوماكنتش راجعة من الحج لسه من يومين كنت عرفتك مقامك
يا روح امك


تحديث :
جوزي بيصبرني وبيقوللي معلش لو اشتغلتي في حتة تانية برده ح يكون فيه مشاكل
ما ترديش عليه, دي ظروفك , وتجيبي مواصلات منين من صباحية ربنا يعني؟
لما
المدهول جه المكتب الساعة عشرة الصبح
وبيعيد على وداني نفس الاسطوانة بتاعة اتاخرتي ليه

صدرت لو الوش الخشب
مش ناقصني مصايب
هي مرارة وحدة معنديش غيرها
قولولي اعمل معاه ايه؟؟؟؟

الأحد، 7 يناير، 2007

انا رجعت اهوه

رجعت من الحج بالسلامة والحمدلله
دعيت للكل ولكل اللي وصوني بدعاء سبيشال
عايزة اقرا كل اللي كتبتوه
وحشتني مدوناتكم