السبت، 16 ديسمبر 2006

الاتنين احلى من بعض

حفل ختام دورة الالعاب الاسيوية لم يقل اهمية عن حفل الافتتاح رغم اننا اعتدنا ان دورات الالعاب بشكل عام تختتم بحفل بسيط
الا ان هذا جاء مبهرا براقا وتكاد لا تستطيع ازاحة عينيك عن الشاشة عند عرضه
علاء الدين والمصباح السحري
علي بابا والاربعين حرامي
السندباد
اساطير تجسدت بأساطير حية
لا نستطيع الحكم هل كان الافتتاح اقوى ام الختام
الاتنين احلى من بعض
برافو قطر

الخميس، 14 ديسمبر 2006

أقوى أفلام العيد...العب العب

ايه المسخرة اللي بيعملها (الفنان) الصغير ده؟؟؟؟
كل الناس شافت حصل ايه في افتتاح الفلم بتاع اول ايام العيد وسط البلد
يجي الفنان الصغير بقى وبيقوللك ايه؟؟؟
اقوى افلام العيد
العب العب
ورقص ومياصة وبكيني واخر حلاوة ياعم
ياترى الافتتاح ح يكون فين المرة دي؟؟؟؟؟؟؟

الأربعاء، 13 ديسمبر 2006

باركولي يا جماعة

ازيكو عاملين ايه؟؟؟
انا مسافرة الحج السنة دي
لسه ماقلتش لتنتون واخوه الرزل لكن دي ح تبقى مفاجأة عمرهم
اولا تنتون مسافر
سامي سابنا مبارح
ميدو مشاكل رايح الحج
وانا حجزت وطالعة
اشوفكم على خير

الثلاثاء، 12 ديسمبر 2006

مش ح تقدر تبربش بعينيك

كنت مبارح بشوف روتانا سينما
والصراحة اول مرة اشوف مقابلة بتتكلم فيها حنان ترك كده بدون رسميات
حد يقدر يقوللي الست دي مالها؟؟؟؟
لا بجد والله
انا عايزة اعرف هي كده في الاصل والا دايس عليها قطر خلاها كده
مش ح تقدر تغمض عينيك كانت ح تبقى معبرة اكتر لو بقت مش ح تقدر تبربش بعينيك
عشان الست حنان كانت طول الحلقة بتهز رموشها كده اكنها الجميلة النايمة
ربنا يسترها معانا

الأحد، 10 ديسمبر 2006

بوست جديد بمناسبة نجاة سامي

بجد بجد
ربنا ما يعيد الاهوال اللي مرت عليك هنا واللي شفتها ياسامي
سامي ده هو الموظف الجديد معانا
بقى لو 3 شهور , بس شاف من أهوال تنتون وتنتن ما لا يوصف
وآخر حاجة , قرر انو يسيب البجم دول ويمشي من البلد (آسفة للتعبير) بس هي دي احسن حاجة ممكن اوصفهم بيها
متخيلين عشان يوفرو 300 حاجة يحجزولو على رحلة 12 ساعة لبلد تبعد عن هنا ساعتين بس ؟؟؟؟؟
مبروك نجاتك من الاهوال دي يا سامي
ولو ان طيبة قلبك كان من الممكن تخليك تخسر اكتر من كده
سامي لحد النهارده بيقول انو سعيد لانو تعرف بيهم , حد يصدق ؟؟؟؟
لو بتقول كده عشان تفهمنا انك تعلمت من قرفهم عشان ماتتعاملش مع الصنف ده تاني ماشي
بس لو غير كده اسمحلي انا ما شفتش طيبة قلب بالشكل ده
احتفالا بسفر سامي كتبت البوست ده
ولو اني مش مبسوطة انو ح يسيبنا ويمشي
بس كلو ف مصلحتو
وعقبالي كده اما لاقي شغل تاني بس يكون كويس
واسيبهم انا كمان

الجمعة، 8 ديسمبر 2006

ايه الناس اللي ما بتفهمش اللي بتسمع فيروز والست دي؟؟؟؟؟؟

باستغراب شديد واستنكار جامد ابتدا تنتون الكلام
ياخي ايه الناس اللي بتسمع فيروز دي ؟ مش مكلف نفسو عناء انو يقول عن فيروز دي ست فيروز ولا حاجة
هو اهم من كده
يعني بيعجبهم فيها ايه؟ دي حتى صوتها يجيب الكابة .....اللللله ؟؟؟ الراجل ده بيهلس والا بيتكلم جد؟؟؟
انا كنت سامعاه من الاوضة التانية بيتكلم مع نوني (وده الواد الجديد اللي معانا وحبيب قلب تنتون وصاحبو من زمان )الانتيم
ومسكت اعصابي وما تكلمتش ولا فتحت بقي خالص
بس الموضوع تطور وابتدا الهايف يجيب في سيرة الست (واللي ميعرفوش مين الست دي يعني الست ام كلثوم) وسمعو الكلام اللي في الهجايص بقى
قال ايه ام كلثوم صوتها مش حلو؟؟؟؟ ايه ده بقا؟؟؟؟؟
وقال ايه هو مبيحبهاش ومبيسمعهاش وهي اصلا ما تتسمعش
لحد كده وانا حسيت الجنونة قبت في دماغي وقمت من مكاني
كنت عايزة اروح اضربه
بس اكتفيت باني عملت لي فنجال نسكافيه وقاعدة مروقة ومتجاهلاه تماما وهو لازال بيقبح وبينتور الكلام شمال ويمين
محمود بقا ماسكتلوش
انا اصلا كنت مستغربة انو قاعد ساكت طول النص ساعة اللي فاتت وعقلو الصعيدي مستحمل الوله ده
وبيتكلم في التلفون يمكن ما سمعوش
بس على مين؟؟؟
اتضح انو كان بيتكلم في التلفون وسامع الكلام الجامد اللي الواد كان بيقولو
وانتفض من مكانو كده فجأة وابتدا : لو انت مش فاهم ام كلثوم ما تقولش عليها صوتها مش حلو انت فاهم والا لأ
تنتون ده مدير محمود وممكن بساطة عالكلمة دي يرفدو . ما هو واقف لو على أي غلطة صغيرة بردو
قام تنتون من مكتبو وجه غضبان وسمعتو بصوت عالي بيقول : لو انا مابحبش ام كلثوم فده مش يعني اني ما بفهمش فاهم يا محمود
وابتدا النقاش يسخن
وان كان علي انا كنت فرحانة بيه اوي
ومبسووووووووووووووطه خااالص
اقلها انو كان بيشفي غليلي من تنتون المعفن ده
واشتد النقاش كمان وكمان ووصل السؤال عندي
تنتون : انتي بتسمعي ام كلثوم دي يا فلة؟؟؟
فلة : في كل الاحوال لو انا مفهمتش ام كلثوم مش ح قول عنها مش كويسة ولا صوتها مش حلو هي ممتازة بس ممكن اكون انا اللي مش فاهماها , متقدرش تقول عن كل البني ادمين مبيفهموش يعني
وعلى كده تنتون اكنو اتضرب بسد الحنك وقفل الموضوع ورجع مكتبو عادي
اسمعو النهاردة قال ايه بيسأل نوني
تنتون : الا قوللي يا نوني اقدر الاقي اغاني لفيروز منين عايز انسخ سيدي كامل ليها من الانترنت
عجبي

الثلاثاء، 5 ديسمبر 2006

عجبي

حابة اكتب من زمان اوي , بس يمكن كنت محتاجة اقرا شوية بلوجات عشان اعرف هي بتتكلم في ايه.المهم اديني بكتب وخلاص
ماهو لو كان فيه حاجة تاني اعملها ماشي بس كلكم ح تقولو امال دي بتشتغل فين؟
انتو عارفين اللي بيحطو الخضار بتاعتهم عالناصية وينادو عليها؟ اهي الشركة بتاعتنا زيهم , وعلى رأي واحد زميل لينا هنا بيقوللي من الأفضل انك تشيلي كلمة الشركة دي خالص.مفيش شغل رسمي يا جماعة احنا لو جالنا زبون نشتغل لو ما جالناش اهو احنا قاعدين واديني بكتب بلوجات اهوه
افتكرت وانا بقرا البلوج بتاع طاهر (كله محصل بعضه) انه بيتكلم عني
الشركة بكفاياها خالص واحد هو اللي يشتغل الشغل كلو , بس مين الواحد ده؟؟ أنا طبعا كلو فوق دماغي والنتيجة ايه
انا ما بنامش من وجع ايدي من كتر ما بكتب عالكمبيوتر واحيانا بروح البيت مالاقيش حاجة اكلها عشان معنديش وقت اصلا اشتري اي حاجة.ما علينا
وفي الاخر ايه الفايدة يعني؟؟؟
اديهم نصبو علي ال500 بتاعتي ولا قدرت اتكلم معاهم حاجة , يومها تمنيت اني ما رجعش هنا تاني , اتقهرت منهم اوي , بس هنعمل ايه؟ ادينا بنتعلم
الافظع من ده كلو اني كنت في الاول خالص متحمسة للشغل حماس مش طبيعي
واديني اهوه بتمنى اني اسيبهم النهاردة قبل بكرة
معرفش هي الناس دي ما بتحسش والا ايه
تنتون بيعدي جنب اخويا فالشارع ولا كانو يعرفو ولا بيسلم عليه ولا حاجة (ماهو مالوش عندو مصلحة) بس يوم اللي احتاج من شركتو حاجة قاللو انت فين يا راجل وازيك وعامل ايه ومن اساليب الفتاكة اياها
طبعا قاعد بيتكلم دلوقتي انو ما بيحبش يتعامل مع الناس اللي بتسلم عليه عشان مصلحة
عجبي

تعريف

أول حاجة احب اعرفكو بيهم
تنتون وتنتن دولا اخوات,اخوات بجد,بس عايشين بعيد
قاعدين بيلمو فلوس وبينصبو على خلق الله
تنتون:الصغير يعني متجوز واحدة خواجاية انما ايه ؟؟ برقبتو
تنتن:أيوا الكبير العاقل الراسي هو الكل ف الكل
وشكلو كده واخد على قفاه
ومش ناوي يجيبها البر ابدا
أول ما شفتهم, الانطباع الأول عنهم يعني كان التالي تنتون ده شفت انو رخم رخامة يباي بس تنتن كان شكلو كده هادي واداني شعور بانو عاقل كده مش عارفة ازاي.ده انا كنت هبلة ومش دريانة بنفسي
بس وقتها الباش مهندس الاسمراني قاللي :انتي ارتحتي والا لأ؟
قلتلو ارتحت ,مانا كنت عايزة اشتغل وخلاص,احسن من قعدة البيت اللي تطهق دي
وكانت ساعة سودا بعيد عنكم

الاثنين، 4 ديسمبر 2006

كان احساسي صحيح

احساسي ما خذلنيش ولا مرة
ولا مرة
بس ايه اللي خلاني اقوللهم ايوا
ماعرفش
وهم الاتنين
تنتون وتنتن
انتن من بعض
اااااااااااااااااااه
ح حكيلكو الحكاية كلها
بس من اول يوم
وانا مش حاباهم
كان فيه حاجة مش حلوة كدة جوايا بترفضهم
كان احساسي صحيح